Waxyaabaha ay diinteenna sharafta lihi la gaar noqotay isla markaana lagu ammaano ayaa
waxa ka mid ah waxa la yiraahdo "Al-tadarruj" oo macnaheedu yahay kala horraysiinta
arrimaha ama go?aamada.

Qur'aanka kariimka ah oo ah masdarka koowaad ee mudan inay muslimiintu ka soo xigtaan hab
dhaqankooda ayaa waxa uu tilmaamayaa in markii laga reebayay muslimiinta khamriga in la
marsiiyey marxalado kala duwan. Markii hore waxa lagu tilmaamay in dhibkeeda iyo
danbigeedu ka badan yihiin waxtarkeeda ama nafcigeeda. Markaas kadib waxa lagu amray
Muslimiintu inaysan salaadda u dhowaan ayaga oo sakhraansan. Ugu danbeyntiina, waxa la
faray dadka Muslinka ahi inay khamriga ka fogaadaan sideedaba maadaama ay camal shaydaan
oo wasakhaysan tahay.

Haddaba Ilaahay Subxaanahu watacaalaa oo cid ka awood badani aysan jirin ayaa waxa u
darsigaas noogu dhigay in ay muslimiintu arrimahooda u dhowrtaystaan ayadoo la is farayo
samaha xumahana la iska reebayo, taasna loo marayo tubta uu Alle jideeyay oo ah kala
horraysiinta. Waa in dacwada la hormariyo inta aan wax walba la xeerin.

Shacabka Soomaaliyeed oo waa Muslimiin. Waxaanse ognahay inay daashadeen dagaallo sababay
inay jiil dhan garan waayaan waxa la yiraahdo nidaam iyo kala dambayn, iyo xaaraam iyo
xalaal. Isla markaana, waxa ay jiilkani la kowsadeen adduunyo qofku waxa uu doono
samaynayo oo wax hagaya ama wax celinayaa toona aysan jirin.

Taas waxa ka sii daran in jiilkaas kii ka horeeyay laftiisu illaaway wixii samaha ahaa
maadaama ay xummaantu baahday. Sida darted, waxa la dhihi karaa dadku waxay ay si aan
ku-talo-gal aheyn ay ula wada qabsadeen waxyaabo liddi ku ah diinta, dhaqanka suuban iyo
horumarka bani-aadamka.

Dabcan, waa waajib diini ah in lagu dhaqmo diinta Islaamka, waana mid aan cid ka
gorgortami kartaa jirin. Waxaase sidoo kale waajib diini ah ayadana in mujtamaca la
kasbado, islamarkaasna hab ama si ay wax u qaadan karaan loogu sheego. Taas waxan ula
jeedaa in wacyi gelintu ay ka horreyso in la soo rogo qawaaniin dadka dan u ah balse
aysan garanayn inay dan u tahay. Waxaan leeyahay waa in la qanciyo dadka si ay iyagu
dhaqankooda u baddelaan.

Sida caadada ha, qofku waxa uusan garanaynin waxa uu kala horyimaadaa diidmo qayaxan,
wanaag kasta oo ay leeyihiin. Maxkamadaha Islaamiga ah way ku ku ammaanan yihiin amniga
ay ku soo dabbaaleen Caasimadda iyo meelaha ay ka taliyaan, waana ay ku mahadsan yihiin
dadaalkooda weyn. Ha yeeshee, waa inay ku dadaalaan inay la saaxiibaan dadka
Soomaaliyeed, gaar ahaan kuwooda ku dhaqan gobollada ka baxsan caasimadda sida
Jubbooyinka. Dhacdooyinka ka dhacaya meelaha ka baxsan caasimaddu waxa ay fursad siin
karaan dadka diidan in la hirgeliyo shareecada Islaamka.

Waxaa habboon in oodo-dhacameed sida ay u kala sarreeyaan loo kala qaado. Markii aad
ummad xumaan ka reebtana waa in aad u sahli karto siyaabo kale oo xalaal ah oo ay
noloshooda kula soo bixi karaan.

Hadii taas la waayo waxa imanaysa in qofkii uu ku fekero sidii uu uga hortagi lahaa
howlaha ay wataan nidaamkan soo kordhay. Taasna wax dan ah uguma jirin maxkamadaha
curdunka ah ee la hardamaya hagardaamooyinka waaweyn ee uga imanaya dibadda.

Aniga oo soo gabagabaynaya qoraalkan, waxaan kula talinayaa hoggaanka maxkamaduhu inuu
marka hore wax ka qabto arrimaha waaweyn ee ay dadku u baahan yihiin, sida amniga,
deegaanka, caafimaadka, waxbarashada iyo aafooyinka. Waa in xooga ay saaraan dacwada iyo
wacyi-gelinta dadweynaha. Haddii ay dhacdo in la joojiyo qaadka iyo waxyaalaha kalana,
waa in waqti ay badeecado kale ugu wareegi karaan la siiyo. Haddii aan si kale u dhigo,
waxaan ku soo koobayaa xikmaddii ahayd magaalada Rooma hal maalin kuma aysan dhismin.